ஆசிய அளவில் அசிங்கப்பட்ட ஆஸி., : இந்தியா அசத்தல் வெற்றி!

சென்னை: இந்திய அணிக்கு எதிரான முதல் ஒருநாள் போட்டியில் ஆஸ்திரேலிய அணி, 26 ரன்கள் வித்தியாசத்தில் தோல்வியடைந்தது.

இந்தியா வந்துள்ள ஆஸ்திரேலியா அணி 5 ஒருநாள், 3 டி-20 போட்டிகள் கொண்ட தொடரில் பங்கேற்கிறது. முதல் ஒருநாள் போட்டி, இன்று சென்னையில் துவங்கியது. இதில் ‘டாஸ்’ வென்ற இந்திய கேப்டன் விராட் கோலி முதலில் ‘பேட்டிங்’ தேர்வு செய்தார்.

இதையடுத்து களமிறங்கிய இந்திய அணி, 50 ஓவரில் 7 விக்கெட்டுக்கு 281 ரன்கள் எடுத்தது. இதன் பின் மழை குறுக்கிட்டதால் போட்டி நடப்பதில் தாமதம் ஏற்பட்டது. மழை நின்ற பின் ஆஸ்திரேலிய அணிக்கு 21 ஓவர்களில் 164 ரன்கள் இலக்காக நிர்ணயிக்கப்பட்டது.

எட்டக்கூடிய இலக்கை துரத்திய ஆஸ்திரேலிய அணிக்கு அறிமுக வீரர் கார்ட் ரைட்(1), கேப்டன் ஸ்மித் (1), ஹெட் (5) வந்த வேகத்தில் பெவிலியன் திரும்பினர். வார்னர் (25) நீண்ட நேரம் தாக்குபிடிக்கவில்லை.

மேக்ஸ்வெல் மிரட்டல்:
பின் வந்த மேக்ஸ்வெல், வந்த வேகத்தில் அதிரடியை துவங்கினார். இவர் 3 பவுண்டரி 4 சிக்சர்கள் என 39 ரன்கள் எடுத்து அவுட்டானார். ஸ்டோனிஸ் (3), வேட்(9), கம்மின்ஸ் (9) என ஒருவரும் தாக்குபிடிக்கவில்லை.

பால்கன்ர் போராட்டம்:
தொடர்ந்து வந்த பால்க்னர் மட்டும் கடைசி வரை தனி ஒருவனாக போராட, ஆஸ்திரேலிய அணி, 21 ஓவர் முடிவில், 9 விக்கெட்டுக்கு 137 ரன்கள் எடுத்து 26 ரன்கள் வித்தியாசத்தில் தோல்வியடைந்தது.

இதான் ‘நம்பர்-1’:
இந்தியாவுக்கு எதிரான முதல் ஒருநாள் போட்டியில், 26 ரன்கள் வித்தியாசத்தில் தோல்வியடைந்த ஆஸ்திரேலிய அணி, முதல் முறையாக சென்னை மண்ணில் தோல்வியை சந்தித்தது.

* தவிர, இந்திய அணிக்கு எதிரான ஒருநாள் தொடரின் முதல் போட்டியில் முதல் முறையாக ஆஸ்திரேலிய அணி தோல்வியை சந்தித்தது.

* தவிர, ஆசியாவில் பங்கேற்ற ஒருநாள் போட்டியில் தனது குறைந்தபட்ச ஸ்கோரை பதிவு செய்து அசிங்கப்பட்டது ஆஸ்திரேலிய அணி.

11வது தோல்வி:
இந்தியாவுக்கு எதிராக முதல் ஒருநாள் போட்டியில் தோல்வியடைந்த ஆஸ்திரேலிய அணி, அந்நிய மண்ணில் தொடர்ந்து 11வது தோல்வியை பதிவு செய்தது. கடைசியாக கடந்த செப்டம்பர் 2016 அயர்லாந்து அணிக்கு எதிராக அந்நிய மண்ணில் வெற்றி பெற்றது.

பால்கனர் ‘1000’:
இந்தியாவுக்கு எதிரான முதல் ஒருநாள் போட்டியில், ஆஸ்திரேலிய வீரர் பால்க்னர் 12 ரன்கள் எடுத்த போது, ஒருநாள் அரங்கில் 1000 ரன்கள் என்ற மைல்கல்லை எட்டினார்.

மேக்ஸ்வெல் ’2000’:
இந்தியாவுக்கு எதிரான முதல் ஒருநாள் போட்டியில், ஆஸ்திரேலிய வீரர் மேக்ஸ்வெல் 23 ரன்கள் எடுத்த போது, ஒருநாள் அரங்கில் 2000 ரன்கள் என்ற மைல்கல்லை எட்டினார்.